ადამიანით ვაჭრობის (ტრეფიკინგის) ეროვნული და საერთაშორისო სამართლებრივი ასპექტები

Abstract

ადამიანით ვაჭრობა (ტრეფიკინგი) მისი მასშტაბურობისა და სიმძიმის გათვალისწინიებით ყველა სახელმწიფოსთვის რთულად დასამარცხებელი დანაშაულია. დღესდღეობით მან მსოფლიო მოცულობით არალეგალურ ბიზნესის სახე მიიღო; ტრეფიკინგის მსხვერპლთა გამოყენებით ადამიანით მოვაჭრეები საკმაოდ დიდ ფინანსურ მოგებას იღებენ, რის გამოც ეს დანაშაული არ კარგავს აქტუალურობას და „მოთხოვნა-მიწოდების ბაზარი“ მის მნიშვნელოვან წყაროდ რჩება. იგი ორგანიზებულ დანაშაულთა კატეგორიას წარმოადგენს, ორგანიზებულ დანაშაულთან ბრძოლა კი განსაკუთრებული და კომპლექსური მეთოდების შემუშავებას საჭიროებს. აუცილებელია, რომ სახელმწიფოებმა მოახდინონ მყისიერი და სათანადო რეაგირება, განსაზღვრონ ამ დანაშაულთან საბრძოლველად სწორი და ეფექტური პოლიტიკა, შეიმუშავონ მსხვერპლთა გამოვლენის, მათი დაცვისა და რეაბილიტაციისთვის საჭირო ღონისძიებები და გაატარონ ყველა საჭირო ზომა, რათა დაიცვან ადამიანები, პოტენციური მსხვერპლები ამ მძიმე დანაშაულისგან. მნიშვნელოვანია აღინიშნოს ასევე ის წამახალისებელი ფაქტორები, რომლებიც ხელს უწყობს ტრეფიკინგის მასშტაბურობას, ესენია მძიმე სოციალური და ეკონომიკური ფონი, უმუშევრობა, საზღვარგარეთ სამუშაოს საძიებლად წასვლა, შეიარაღებული კონფლიქტის ზონა, არასათანადო შრომითი რეგულირება, არასაკმარისი სამართლებრივი მექანიზმები ამ დანაშაულთან ბრძოლის, აღკვეთისა და პრევენციისთვის. რადგანაც ადამიანით ვაჭრობის გამომწვევი მიზეზი ან წამახალისებელი ფაქტორი არაერთია, არამედ მრავალფეროვანი, აუცილებელია მის წინააღმდეგ ბრძოლა იყოს კომპლექსური და არ შემოიფარგლებოდეს ერთი კონკრეტული მიმართულებით.