სამსახურებრივი მოვალეობის შესრულებისას მიყენებული ზიანის ანაზღაურების თავისებურებები

დელიქტური სამართალი სამართლის მეცნიერების ერთ-ერთი
ცენტრალური ნაწილია. იგი უზრუნველყოფს იმ ზიანის აღმოფხვრას, რომელიც
პირმა სხვა პირს მიაყენა. აღნიშნული, საბოლოო ჯამში, სამოქალაქო ბრუნვის
სტაბილურობასა და სამოქალაქო ბრუნვის მონაწილეთა ინტერესების
დაბალანსებას უზრუნველყოფს. სამართლის ზოგადი პრინციპებიდან
გამომდინარე, როგორც წესი, დელიქტური სამართლის საფუძველზე პირის
პასუხისმგებლობის საფუძველი ბრალეული ქმედებაა, თუმცა არსებობს
შემთხვევები, როდესაც ზიანის ანაზღაურებაზე პასუხისმგებელი და ბრალეული
ქმედების განმახორციელებელი პირი ერთმანეთს არ ემთხვევა. მითითებულ
შემთხვევათა რიგს მიეკუთვნება დასაქმებულის, მუშაკის მიერ მიყენებულ
ზიანზე პასუხისმგებელ პირად დამსაქმებლის განსაზღვრა.
მიუხედავად იმისა, რომ საქართველოში უმუშევრობის დონე საკმაოდ
მაღალია, მაინც შთამბეჭდავია დასაქმებულ პირთა საერთო რაოდენობა.

აღნიშნულიდან გამომდინარე, სავარაუდოა, რომ დელიქტური მოთხოვნებიდან
გამომდინარე ზიანის ანაზღაურებასთან დაკავშირებულ დავათა დიდ ნაწილში
ზიანის მიმყენებელ პირად დასაქმებული პირი იყოს წარმოდგენილი, რომელმაც
სამსახურებრივი მოვალეობების შესრულებისას მიაყენა ზიანი მესამე პირს.
ამდენად, მნიშვნელოვანია საქართველოს სამოქალაქო კოდექსის 997-ე მუხლით
მოწესრიგებული ურთიერთობის საფუძვლიანი გაანალიზება და პრაქტიკაში
მისი სწორად გამოყენება.
ქართულ სასამართლო პრაქტიკაში ძალზე მწირია სსკ-ის 997-ე მუხლის
გამოყენების მაგალითები. არის ნორმის არასწორი ინტერპრეტაციის
შემთხვევებიც. მითითებული თემის დამუშავების სიუხვით არც ქართული
სამეცნიერო ლიტერატურა გამოირჩევა. ამდენად, სამსახურებრივი მოვალეობის
შესრულებისას მიყენებული ზიანის ანაზღაურების თავისებურებების განხილვა
მნიშვნელოვანია როგორც თეორიული, ისე პრაქტიკული თვალსაზრისით.