კვდრადშობადობის შესახებ მონაცემთა ხარისხის შეფასება და დაწესებულებების ხელმძღვანელების ცოდნადამოკიდებულება დაბადების რეგისტრის მიმართ

Abstract

2016 წლამდე საქართველოში არ არსებობდა ანგარიშგების ისეთი მექანიზმი, რომელიც შესაძლებელს გახდიდა ანტენატალური სერვისების დაკავშირებას ორსულობის გამოსავალთან, შესაბამისად, შეუძლებელი იყო ორსულობის პერიოდში არსებული გართულებების მკვდრადშობადობასთან კორელაციის შესწავლა. 2016 წელს საქართველოში დაინერგა ორსულთა და ახალშობილთა ჯანმრთელობის მეთვალყურეობის ელექტრონული სისტემა (ე.წ. „დაბადების“ რეგისტრი), რომლის მეშვეობით ხორციელდება თითოეული ორსულის უწყვეტი მონიტორინგი პირველი ანტენატალური ვიზიტიდან მშობიარობის ჩათვლით. დაბადების რეგისტრში ჩართულია ყველა ანტენატალური და სამეანო პროფილის მქონე დაწესებულება. დღესდღეობით, დაბადების რეგისტრი არის ანტენატალური და სამეანო მომსახურების მონიტორინგის და შეფასების ერთ-ერთი მთავარი წყარო და ფართოდ გამოიყენება პოლიტიკის შემუშავების კუთხით. დაბადების რეგისტრის მონაცემებზე დაყრდნობით ხდება პერინატალური რეგიონალიზაციის პროგრამის შემდგომი საფეხურების განსაზღვრა, შესაბამისი რეგულაციების შემუშავება და სხვა. ყოველივე ეს განაპირობებებს დაბადების რეგისტრში არსებული მონაცემების მაღალი ხარისხისა და მონაცემთა სისრულის აუცილებლობას. თემის აქტუალობა: დაბადების რეგისტრის მონაცემებით, ხშირია მკვდრადშობადობის შემთხვევები, როდესაც ანტენატალური პერიოდი მიმდინარეობს ყოველგვარი გართულებების გარეშე, განსაკუთრებით დროული მშობიარობისა და ნაყოფის ნორმალური წონის პირობებში. თემის აქტუალობას განაპირობებს ამ ინფორმაციის ვალიდურობის დადგენა, რაც განხორციელდა დაავადებათა კონტროლისა და საზოგადოებრივი ჯამრთელობის ეროვნული ცენტრის მიერ დაბადების რეგისტრის მონაცემთა აუდიტის ფარგლებში. მოხდა მკვდრადშობადობის შემთხვევებთან დაკავშირებული ინფორმაციის სისრულის შესწავლა, დაბადების რეგისტრში ატვირთული ინფორმაციის შედარებით ორსულთა სამედიცინო ბარათებში არსებულ ჩანაწერებთან. 2018 წელს ქვეყანაში დაფიქსირებული 436 მკვდრადშობადობის შემთხვევიდან რანდომული შერჩევის პრინციპით შეირჩა 199 შემთხვევა. მოხდა აღნიშნული შემთხვევების სამედიცინო ბარათებისა და რეგისტრში დაფიქისირებული მონაცემების შემოწმება წინასწარ განსაზღვრული კითხვარის მიხედვით. კვლევის მიზანი: კვლევის მიზანია სამეანო-გინეკოლოგიური მიმართულების მქონე სამედიცინო დაწესებულებათა ხელმძღვანელების ინფორმირებულობის განსაზღვრა დაბადების რეგისტრის მიმართ, მათი დაწესებულებების მხრიდან მონაცემთა შეტანის მექანიზმის დადგენა, შეტანილი მონაცემების ხარისხის განსაზღვრა და არსებული პრობლემების იდენთიფიკაცია.