ბორჯომის მუნიციპალიტეტის გეომორფოლოგიური შეფასება, ეგზოდინამიკური პროცესების ანალიზი

თემის აქტუალურობა: ბორჯომის მუნიციპალიტეტი საინტერესოა თავისი გეოლოგიური, გეომორფოლოგიური, კლიმატური პირობებით. ეს რეგიონი გამოირჩევა გეოდინამიკური პროცესების აქტიური გამოვლინების თვალსაზრისით. სტიქიური პროცესების განვითარება-გააქტიურება განპირობებულია ტერიტორიის გეოლოგიური აგებულების სირთულით, რელიეფის, ლანდშაფტურ-კლიმატური პირობების კონტრასტულობით და ადამიანის მაღალი ანთროპოგენური ზეგავლენით გარემოზე.
ბორჯომი სტრატეგიული მნიშვნელობის ადგილმდებარეობით ხასიათდება, უნიკალურია ბუნებრივი პირობებით. მის ფარგლებში განლაგებული საინჟინრო-სამეურნეო ობიქტებით ქვეყანაში დოვლათის საკმაოდ დიდი ნაწილი იქმნება, მაგრამ ამ ყველაფერს მეორე უარყოფითი მხარეც აქვს, რაც ინტენსიური საინჟინრო-სამეურნეო საქმიანობის და ბუნებრივი პირობების ურთიერთკავშირის შედეგად გამოწვეულ საშიშ გეოდინამიკურ პროცესებს გულისხმობს, რასაც დიდი ზიანი მოაქვს რეგიონისათვის. კვლევის ობიექტი: კვლევის ობიექტს წარმოადგენს ბორჯოის მუნიციპალიტეტი.
მიზანი და ამოცანები: საკვლევი აუზის ფარგლებში სტიქიური პროცესები დიდ ზიანს აყენებს სოფლის მოსახლეობას. სტიქიური პროცესები განსაკუთრებით აზიანებს სასოფლო-სამეურნეო სავარგულებს, რომელსაც საკმაოდ დიდი ტერიტორია უჭირავს, ასევე ზიანდება გზები, ხიდები, საცხოვრებელი სახლები. აქ განვითარებულ საშიშ ბუნებრივ პროცესებს შორის განსაკუთრებულ პრობლემას წარმოადგენს მეწყრული და კლდეზვავ-ქვათაცვენითი მოვლენები, ღვარცოფები, წყალდიდობები, მდინარეთა ნაპირების გამორეცხვა. ასევე აღსანიშნავია ატმოსფერული ნალექის უხვი რაოდენობა ინტენსიური წვიმის სახით, რაც იწვევს მდინარეთა ადიდებას და საკმაოდ ხშირად წყლის კალაპოტიდან გადმოსვლას. ამას ჭალებში არსებული სავარგულების, საკარმიდამო ნაკვეთების, საცხოვრებელი სახლების დატბორვა მოსდევს ხოლმე, რაც დიდი მატერიალური ზარალია როგორც რეგიონისთვის, ისე ქვეყნისთვის.