შინაპატიმრობა საქართველოს სისხლის სამართლის კოდექსისა და არასრულწლოვანთა მართლმსაჯულების კოდექსის მიხედვით

სისხლის სამართლის კანონმდებლობაში სასჯელის ინსტიტუტი წარმოადგენს ერთ-ერთ მნიშვნელოვან ინსტრუმენტს, რომლის მიხედვითაც ხორციელდება დამნაშავეთა დასჯა, ერთგვარი სამართლიანობის აღდგენა, რომელიც, თავის მხრივ, სასჯელის ერთ-ერთი მიზანია. თუმცა, ვფიქრობ, რომ სასჯელის უფრო მნიშვნელოვან მიზანს წარმოადგენს დამნაშავის რესოციალიზაცია-რეაბილიტაცია. სასჯელის ზემოაღნიშნული მიზნების ფუნქციების შესრულება არ არის დამოკიდებული სასჯელის სიმკაცრეზე. შესაბამისად, გამუდმებით მიმდინარეობს სისხლის სამართლის კანონის ლიბერალიზაცია. ხდება მკაცრი სასჯელების შემსუბუქება, საპატიმრო სასჯელების არასაპატიმრო სასჯელებით შეცვლა. თავისუფლების აღკვეთა, რომელიც დღესდღეობით სასჯელის ყველაზე მძიმე სახეს წარმოადგენს , ისტორიულ წარსულში, როდესაც ის მიიღეს, საკმაოდ მნიშვნელოვანი წინ გადადგმული ნაბიჯი იყო იმდროინდელი კანონის ლიბერალიზაციის თვალსაზრისით, რადგან მან ჩაანაცვლა ისეთი სახის სასჯელები რომელთა მიზანიც პირის სულიერი თუ ფიზიკური ტანჯვის გამოწვევა იყო(მაგალითად სიკვდილით დასჯა). მსოფლიოში დღესდღეობით მიღებულია, რომ ნაკლებად მკაცრი, ჰუმანური სასჯელები, მათ შორის ალტერნატიული, არასაპატიმრო სასჯელები უფრო შედეგიანი და ეფექტურია.