ელექტრონული ვაჭრობის დაბეგვრის სამართლებრივი რეგულირების თავისებურებანი: ეროვნული და უცხოური კანონმდებლობისა და პრაქტიკის ანალიზი

Abstract

ელექტრული ვაჭრობის დაბეგვრის სამართლებრივი რეგულირება მე-20 საუკუნის მიწურულიდან დღემდე გამოწვევას წარმოადგენს ციფრული ინდუსტრიის სამყაროსთვის. ეკონომიკური თანამშრომლობისა და განვითარების ორგანიზაციამ (OECD) ჯერ კიდევ მე-20 საუკუნის მიწურულს ხაზი გაუსვა ელექტრონული ვაჭრობის მნიშვნელობას, აღიარა, რომ მას აქვს უდიდესი პოტენციალი, გავლენა მოახდინოს 21-ე საუკუნის მსოფლიო ეკონომიკის განვითარებაზე და 1998 წლის 8 ოქტომბერს „ოტავას კონფერენციაზე“ მიიღო რეკომენდაციები ელექტრონული ვაჭრობის დაბეგვრასთან დაკავშირებით. აღნიშნული რეკომენდაციების მიღების შემდეგ, ეკონომიკური თანამშრომლობისა და განვითარების ორგანიზაციას (OECD) გამოქვეყნებული აქვს არაერთი ანგარიში და რეკომენდაცია, რომლებიც ასახავს „ოტავას კონფერენციაზე“ მიღებული „ჩარჩო შეთანხმების“ აღსრულების პროგრესს. დისკუსია ელექტრონული ვაჭრობის დაბეგვრის საკითხებთან დაკავშირებით დღემდე არ განელებულა, რასაც ადასტურებს ამავე ორგანიზაციის მიერ 2019 წლის მარტში გამოქვეყნებული კვლევა, რომელიც ეხება ციფრული პლატფორმების როლს დამატებული ღირებულების გადასახადთან მიმართებით და 2019 წლის 28-29 მაისს მიღებული სამოქმედო გეგმა – პროგრამა, რომელმაც მიზნად დაისახა თანამედროვე ეკონომიკის ციფრული ბუნებიდან წარმოშობილი საგადასახადო გამოწვევების კონსენსუსით გადაჭრა, აგრეთვე ევროპის პარლამენტის მიერ 2019 წლის თებერვალში გამოქვეყნებული კვლევა საერთაშორისო საგადასახადო საკითხებზე ციფრული სამყაროს გავლენის შესახებ.