ადმინისტრაციული ორგანოს მიერ კანონიერების პრინციპის დაცვა ადმინისტრაციული ხელშეკრულების შესრულებისა და შეწყვეტისას

ადმინისტრაციული ხელშეკრულების, როგორც საჯარო უფლებამოსილების
განხორციელებისთვის ნორმატიულად განსაზღვრული ადმინისტრაციული
ორგანოს საქმიანობის ფორმის გამოყენება უკავშირდება ადმინისტრაციული
ორგანოსთვის კანონმდებლობით მინიჭებულ უფლებებსა და დაკისრებულ
ვალდებულებებს, რომელთა ფარგლებში მოქმედებაც მმართველობის
ორგანოებს აქცევს კანონიერების ზოგადი პრინციპის დაცვის იმპერატიული
დათქმის ქვეშ და ახდენს ადმინისტრაციულ-სახელშეკრულებო
ურთიერთობაში ადმინისტრაციული ორგანოების მოქმედების
სამართლებრივ ბოჭვას, რაც თავის მხრივ წარმოადგენს ადმინისტრაციული
ხელშეკრულების როგორც დადების, ისე მისი შესრულებისა და შეწყვეტის
პროცესში ადმინისტრაციული ორგანოების მიერ კანონშესაბამისი ქმედებების
განხორციელების გარანტიას საჯარო ინტერესების/ამოცანების რეალიზების
მიზნით.
მიუხედავად ადმინისტრაციული ორგანოების საქმიანობის ყველა ფორმის და,
მათ შორის, ადმინისტრაციული ხელშეკრულების ფარგლებში მოქმედების
დროს ადმინისტრაციული კანონმდებლობით განსაზღვრული საჯარო
მმართველობის ზოგადი პრინციპების არსებობისა, რომლებმაც უნდა
უზრუნველყოს ადმინისტრაციული ორგანოს მიერ ადმინისტრაციულ
ხელშეკრულებასთან დაკავშირებული პროცესის კანონშესაბამისობა, როგორც
წესი ადმინისტრაციული ორგანო ყოველთვის კანონიერების პრინციპის
დაცვის იდეით არ მოქმედებს, შესაბამისად, მნიშვნელოვანია, გარდა
ადმინისტრაციული ხელშეკრულების დადებისთვის კანონიერი
ადმინისტრაციული წარმოების ჩატარების ვალდებულებისა,
შეძლებისდაგვარად დეტალურად, სისტემატიზირებული ფორმით
განისაზღვროს ადმინისტრაციული ხელშეკრულების შესრულებისა და
შეწყვეტის პროცესში ადმინისტრაციული ორგანოს უფლება-მოვალეობებისა
და მოქმედების თავისუფლების ფარგლების ზოგადსავალდებულო
სტანდარტები.