კორპორაციული საფარველის გარღვევა შეზღუდული პასუხისმგებლობისას საგადასახადო ვალდებულებისათვის თავის არიდების დროს

შეზღუდული პასუხისმგებლობის სამართლებრივი ფორმა მნიშვნელოვანი
მონაპოვარია სამართლის ისტორიაში. სწორედ ეს ინსტიტუტია, რომელიც აძლევს
პირებს სტიმულს, თამამად წამოიწყონ სამეწარმეო საქმიანობა, რაც, საბოლოო ჯამში,
სახელმწიფოს ეკონომიკაზე აისახება. კორპორაციის ამგვარი სტრუქტურა,
დამფუძნებელ პარტნიორს, აძლევს საშუალებას, კომპანიის პასუხისმგებლობა,
კრედიტორების წინაშე, კომპანიისავე ქონებით შემოფარგლოს, თავად კი დარჩეს
დაცული მისი ვალდებულებებისაგან. თუმცა, ასეთი პრივილეგია, ყოველთვის თავის
ტკივილია კრედიტორებისთვის, ვინაიდან, შესაძლოა, ერთხელაც, ასეთი
საწარმოსგან, ვალდებულების შესრულება მოითხოვო და აღმოაჩინო, რომ
ამისათვის, მას საკმარისი სახსრები არ გააჩნია. ასეთი შედეგი, სამეწარმეო
საქმიანობის რისკებიდან გამომდინარე, ბუნებრივია და კანონის თვალშიც
ჩვეულებრივ მოვლენას წარმოადგენს. თუმცა, პრობლემა მაშინ იჩენს თავს, თუ კი
პირები, შეზღუდული პასუხისმგებლობის სამართლებრივ ფორმას, ბოროტად
გამოიყენებენ და ამით კრედიტორებს აყენებენ უსამართლო ზიანს. იქ, სადაც
არსებობს პრივილეგია, ასევე არსებობს ალბათობა იმისა, რომ მას, პირები, ბოროტად
გამოიყენებენ. ასეთი ქმედების შედეგები, შეიძლება, განსაკუთრებით მწვავე
აღმოჩნდეს, როდესაც გადახდისუუნარო საწარმოს კრედიტორი თავად
სახელმწიფოა.
საგადასახადო ვალდებულებიდან გამომდინარე, გადასახადების გადამხდელად
რეგისტრირებული პირი, ვალდებულია გადაიხადოს საგადასახადო კოდექსით
დადგენილი გადასახადი, სახელმწიფოს ბიუჯეტის სასარგებლოდ.
გადასახადებისათვის თავის არიდება, ქართული კანონმდებლობით, დანაშაულებრივ
ქმედებას წარმოადგენს. ამ დროს, პირები, გადასახადების დამალვით, თავს არიდებენ
კუთვნილ ვალდებულებას სახელმწიფოს წინაშე, სახელმწიფო კი იმ კორპორაციული
საფარველის წყალობით, რომლითაც საწარმოს უკან მოქმედი პირები იმოსებიან,
შესაძლოა, დაზარალებული აღმოჩნდეს. ასეთი შედეგების წინააღმდეგ, გამჭოლი
პასუხისგებლობის დოქტრინა ეფექტური ინსტიტუტია, რომლის გამოყენებაც,
ქართული სამართლის პრაქტიკაში, უახლეს და უმნიშვნელოვანეს პრეცედენტს
წარმოადგენს. ამ მხრივ, ჩვენი ქვეყნის გამოცდილება მწირია, თუმცა, ამის მიზეზებს,
საქართველოში განვითარებული მოვლენები, ნათლად წარმოაჩენს.