პერსონალური მონაცემების დაცვის სამართლებრივი მნიშვნელობა და სტანდარტები ბიზნეს ურთიერთობებში

მეწარმე, რომელიც ახალ პროდუქტს ქმნის და ბაზარზე ადგილის
დამკვიდრებას ცდილობს, შესაძლოა, რეგულაციების სიმრავლეს, დაბრკოლებად
აღიქვამდეს. მით უფრო, თუ ჯერ არ აქვს საშუალება, იურიდიულ, ფინანსურ,
თუ ტექნიკურ საკითხებში, ისარგებლოს შესაბამისი დარგის სპეციალისტების
დახმარებით.
თუმცა, გონივრული კანონმდებლობა და რეგულაციები, ყოველთვის, ისეთი
ღირებულების დასაცავად იქმნება, რომელიც სახელმწიფოსთვისაც
მნიშვნელოვანია, მოქალაქისთვისაც და ბიზნესისთვისაც. „პერსონალურ
მონაცემთა დაცვის შესახებ“ საქართველოს კანონის შემთხვევაში, ეს
ღირებულება პირადი ცხოვრების ხელშეუხებლობა და მისი ერთ-ერთი მთავარი
კომპონენტი - პერსონალური მონაცემების დაცვაა.
საქართველო ერთ-ერთია მსოფლიოს იმ 100-ზე მეტ ქვეყანას შორის,
რომელშიც პერსონალურ მონაცემთა დაცვის კანონმდებლობა მოქმედებს და
თანაბრად ვრცელდება, როგორც საჯარო, ისე კერძო ორგანიზაციებზე. ბიზნესს,
ამ კანონმდებლობის მოთხოვნათა დაცვით, შექმნილი პროდუქტი, შესაძლოა,
დაეხმაროს რესურსების დაზოგვაში, მომხმარებლების და საკუთარი გუნდის
ნდობის მოპოვებაში და, შესაძლოა, იქცეს კონკურენტულ უპირატესობადაც.
განსაკუთრებით მაშინ, თუ კომპანია გეგმავს საერთაშორისო ბაზარზე გასვლას.
წინამდებარე კვლევა, საკითხის სრულყოფილად შესწავლის მიზნით,
მიმოიხილავს არამარტო ქართულ ნორმატიულ ბაზასა და პრაქტიკას, არამედ
წარმოაჩენს პერსონალურ მონაცემთა დაცვის გარანტიების შექმნის კუთხით
წარმატებული და გამოცდილი ქვეყნების იმ სამართალშემოქმედებით და
პრაქტიკულ ასპექტებს, რომელთა განხორციელება, საქართველოშიც,
მიზანშეწონილი და აუცილებელია.
ნაშრომში წარმოდგენილია, პერსონალურ მონაცემთა დამუშავებისას, ისეთი
საშუალებების გამოყენების არსი და მნიშვნელობა, როგორებიცაა მონაცემთა
ავტომატური დამუშავება, ნახევრად ავტომატური დამუშავება და
არაავტომატური საშუალებით დამუშავება. განხილულია, პერსონალურ
მონაცემთა დამუშავებისას, თითოეული მათგანით შესრულებული სამუშაოს
დადებითი და უარყოფითი მხარეები და გამოვლენილია მონაცემთა
დამუშავების ისეთი სახე, რომელიც ყველაზე უკეთ უზრუნველყოფს
პერსონალურ მონაცემთა გამჟღავნებისაგან დაცვას.