ონლაინ არბიტრაჟის როლი ბიზნეს დავებში

წინამდებარე სამაგისტრო ნაშრომი შეეხება ონლაინ არბიტრაჟის როლს
ბიზნეს დავებში. ყურადღება გამახვილებული იქნება იმ დეტალებზე, თუ რა
ცვლილებების შეტანა შეუძლია ონლაინ არბიტრაჟს ბიზნეს სამყაროში,
რატომ არის აღნიშნული ინსტიტუტი ახალი სიტყვა დღევანდელი
მოცუმულობით და რა პროცედურებთან არის დაკავშირებული ამ
ინსტიტუტით სარგებლობა. ასევე საუბარი იქნება მის დადებით და
უარყოფით მხარეებზე, სამომავლო პერსპექტივაზე და ონლაინ არბიტრაჟის,
როგორც დავის გადაწყვეტის საშუალების ეფექტურობაზე. საუბარი მექნება
იმ ტენდენციებზე და გამოწვევებზე, რომლებიც დღის წესრიგში დააყენა
ინფორმაციული და კომუნიკაციების ტექნოლოგიების განვითარებამ.
ნაშრომის შესავალ ნაწილში ვისაუბრებ საკითხის აქტუალობაზე, კვლევის
ფარგლებზე, კვლევის მეთოდებზე და ასევე მიმოვიხილავ ნაშრომის
სტრუქტურას.
სანამ ნაშრომის ძირითად ნაწილზე გადავიდოდეთ, აუცილებლად უნდა
აღინიშნოს, თუ რა როლი აქვს ონლაინ არბიტრაჟს ბიზნეს სამყაროში და
რატომ არის ეს ინსტიტუტი შესასწავლად აქტუალური საკითხი. მსოფლიოს
ისეთი ქვეყნები, რომლებიც აქტიურად ცდილობენ დანერგონ
ინფორმაციული და კომუნიკაციების ტექნოლოგიების გამოყენება სხვა და
სხვა სფეროებში რიგი პროცედურების გასამარტივებლად,
დაინტერესებულები არიან მიაგნონ დავის გადაწყვეტის ისეთ საშუალებებს,
რომლებიც იქნებიან როგორც მომხმარებლებისთვის დროისა და ფინანსური
რესურსების დაზოგვის საშუალებები, ასევე ეფექტური და დახვეწილი
ინსტიტუტები, რომლებსაც ექნებათ საშუალება მომხმარებლებს შეთავაზონ
რეალური მექანიზმი დავის მოგვარებისა, ისეთი რესურსით, რომ
კონკურენცია გაუწიოს დავის მოგვარების ტრადიციულ მეთოდებს, იქნება ეს
სასამართლო სისტემები, თუ დავის მოგვარების ალტერნატიული
საშუალებები ოფლაინ სერვისები. რა თქმა უნდა ესეთი ქვეყნების რიგებში
არის საქართველოც, რომელიც ყოველთვის პროდუქტიულად ითვისებდა
ელექტრონულ საშუალებებს და ნერგავდა სხვადასხვა სფეროებში.
დღევანდელი რეალობა არის უტყუარი დამადასტურებელი იმისა, თუ
როგორ შეიძლება ინფორმაციული ტექნოლოგიების პრაქტიკაში რეალიზება
ისე, რომ შეძლოს ღირსეული განვითარების წინაპირობების შექმნა
საზოგადოებაში.