ტერორიზმის დაფინანსების მოდელები

ტერორიზმთან ბრძოლა მსოფლიო ქვეყნების უმნიშვნელოვანესი მიზანი და
პრიორიტეტია, ვინაიდან წარმოადგენს თანამედროვეობის ყველაზე საშიშ და ძნელად
შესაცნობ მოვლენას. ტერორისტულ აქტებს მოყვება ადამიანების მასობრივი
მსხვერპლი, ახდენს ძლიერ ფსიქოლოგიურ ზეწოლას ხალხის მასებზე, ხელს უწყობს
მტრობის გაღვივებას სახელმწიფოებს შორის, პროვოცირებას უკეთებს ომის დაწყებას
და უნდობლობის და ზიზღის გაღვივებას სხვადასხვა სოციალურ და ნაციონალურ
ჯგუფებს შორის.
აღნიშნულ პრობლემას არაერთი კვლევა მიეძღვნა, როგორც ადგილობრივი ისე
საზღვარგარეთის ავტორების, განსაკუთრებით მათი რაოდენობა გაიზარდა ბოლო
წლებში.
საკვლევი თემის აქტუალურობა. ტერორიზმს გააჩნია ღრმა ისტორიული
ფესვები, თუმცა რეალური გასაქანი მიეცა მე-20 საუკუნის მეორე ნახევარში. იგი
შეიძლება XXI საუკუნის შავ ჭირად შეფასდეს. სტატისტიკის მიხედვით, ორ დღეში
ერთხელ ხდება ტერაქტი, რის შედეგადაც ხდება უდანაშაულო ადამიანთა დაღუპვა.
ყოველწლიურად იმატებს ტერაქტების რიცხვი, იზრდება მსხვერპლთა რაოდენობა და
აგრესია, იზრდება ტერორისტული ორგანიზაციების მომზადების დონეც, რაც
გამოიხატება იმაში, რომ ყოველი მომდევნო ტერორისტული აქტი წინაზე საშინელია.
დღესდღეობით ტერორიზმის პრობლემა წარმოდგენს აქტუალურ საკითხს
ყველა ქვეყანაში. ის წარმოადგენს დიდ საფრთხეს ქვეყნის ნაციონალური
უსაფრთხოებისათვის. განსაკუთრებულ ყურადღებას იმსახურებს ის გარემოებები და
დეტერმინანტები, რომლის შედეგადაც ტერორიზმი ვითარდება და მისი მაშტაბები
გამუდმებით იზრდება. სწორედ ასეთი დეტერმინანტი არის ტერორიზმის დაფინანსება.
გლობალიზაციასთან ერთად ტერორიზმის დაფინანსება მსოფლიო მაშტაბზე გავიდა და
გახდა ტრანსნაციონალური მოვლენა და ამასთან ერთად მლოფლიო მაშტაბის
პრობლემაც. აქედან გამომდინარე ტერორიზმის დაფინანსების მოდელების შესწავლა
დროული და აქტუალურია.
შეიძლება ითქვას, რომ ტერორიზმი ეს არის მეთოდი, რის საფუძველზეც
ორგანიზებული ჯგუფი ან პარტია ცდილობს მიაღწიოს მის მიზანს, სისტემატიური
ძალადობის გზით. ტერორიზმი მისი გამოვლინების ნებისმიერ ფორმაში წარმოადგენს
ერთ-ერთ საშიშ, არაპროგნოზირებად და საზოგადოებრივ-პოლიტიკური და
მორალური პრობლემის შედეგს. თუ ადრე ტერორისტული ორგანიზაციების
დაფინანსება ხდებოდა ამა თუ იმ ქვეყნის მიერ და მათ ინტერესებს იცავდა, ეხლა
აღნიშნული ორგანიზაციები ხშირად მოქმედებენ დამოუკიდებლად.