საქართველოში გრიპის ვირუსების ცირკულაცია, მათი ეპიდემიოლოგიური მნიშვნელობა და მოლეკულური ბიოლოგია

Abstract

გრიპი მწვავე ვირუსული ინფექციური დაავადებაა, რომელიც ადვილად გადაეცემა ადამიანიდან ადამიანს. სეზონური გრიპის ვირუსები ცირკულირებენ მთელს მსოფლიოში და აავადებენ ნებისმიერი ასაკის პირებს. ჯანმრთელობის მსოფლიო ორგანიზაციის (ჯანმო) მონაცემებით გრიპით ყოველწლიურად მოზრდილი მოსახლეობის 5-10% და ბავშვების 20-30% ავადდება; ვირუსი 3-5 მილიონამდე მძიმე შემთხვევას იწვევს, რომელთაგანაც დაახლოებით 290 000 – 650 000 ლეტალურად მთავრდება [1]. აშშ-ს დაავადებათა კონტროლისა და პრევენციის ცენტრის მონაცემებით ყოველ წელს 6 000-დან 26 000-მდე 5 წლამდე ასაკის ბავშვი ხვდება საავადმყოფოში გრიპთან დაკავშირებული გართულებების გამო [2]. ზომიერი კლიმატის ქვეყნებში სეზონური გრიპის ეპიდემიები ძირითადად ზამთრის თვეებში ვითარდება, ხოლო ტროპიკულ ქვეყნებში სეზონურობა ნაკლებადაა გამოხატული და ეპიდემიები შესაძლებელია მთელი წლის განმავლობაში დაფიქსირდეს.